Зеиԥш ыҟам ашәҟәқәа

Ажәабжьқәа

Зегьы


Аҧсны абызшәатә политиказы Аҳәынҭқарратә еилакы аҧшьгарала имҩаҧган Аҟәа ақалақь иаҧсуам ашколқәа рҟны аҧсуа бызшәа арҵаҩцәа рметодикатә хеидкыла злахәыз аилатәара.

Аилатәара иара убас иалахәын Аҧсны аҵареи аҭҵаарадырреи рминистр ихаҭыҧуаҩ Медеиа Ченгелиаҧҳа, Аҟәа ақалақь ахадара аҵара аҟәша аиҳабы Лиудмила Адлеиҧҳа, Аҧсны абызшәатә политиказы Аҳәынҭқарратә еилакы аиҳабы ихаҭыҧуаҩ Ҭамила Арышҧҳа, Аҧсны абызшәатә политиказы Аҳәынҭқарратә еилакы аексперт-методист Ада Кәарҷелиаҧҳа.
Аилатәараҟны излацәажәоз азҵаарақәа рхыҧхьаӡараҿы иҟан Аҟәа ақалақь иаҧсуам ашколқәа рҟны аҧсуа бызшәа арҵаҩцәа рметодикатә хеидкыла аусура ахықәкы хадақәа.
Аилатәара алагамҭаз абызшәатә политиказы аҳәынҭқарратә еилакы аексперт-методист Ада Кәарҷелиаҧҳа арҵаҩцәа анкетақәа рзылшеит. Арҭ анкетақәа азырхиан ҷыдала иаҧсуам ашколқәа рҟны аҧсуа бызшәа арҵаҩцәа русураҟны ирҧыло аҧынгылақәеи насгьы реихьӡарақәеи рааҧшразы. Ас еиҧш иҟоу анонимтә анкетақәа арҵаҩцәа алшара рнаҭоит рыпрофессионалтә дырра аҩаӡара аобиективтә хәшьара аҭара, иара убас рнапы злаку аус аҟны иҵарны иқәгылоу азҵаарақәа ралкаара.
Аилатәараҿы иара убас ирылацәажәон иаҧсуам ашколқәа рҟны аҧышәарақәа рымҩаҧысшьа, аметодикатә темақәа ралхра, аҧсуа бызшәа арҵаҩцәа русура аиҿкаара, арманшәалара, аҧсуа бызшәа аурок аҧсахрақәа ралагалара.
Аилатәара иалахәын ҩажәаҩык инарзынаҧшуа арҵаҩцәа аҳҭнықалақь еиуеиҧшым иаҧсуам ашколқәа рҟынтәи. Урҭ абызшәатә политиказы аҳәынҭқарратә еилакы аескперт-методист Ада Кәарҷелиаҧҳа ирыдылгалоз ҳаамҭа иақәшәо аметодикақәа аинтерес рызцәыргеит. Ирҳәеит аусеицура ишазыхиоу. Аилацәара алахәцәа еиқәшаҳаҭхеит арҵаратә процесс аҩаӡаратә система аларҵәара шхымҧадатәу азы. Уи арҵаратә процесс, хымҧада, еиҳа иарманшәалоит, избан акәзар уи еиҿкаахоит ахәыҷқәа рықәреи рылшарақәеи инарықәырышәаны.
Арҵаҩцәа абызшәатә политиказы аҳәынҭқарратә еилакы аусзуҩцәа иҭабуп ҳәа рарҳәеит рурусахь иаадырҧшуа азҿлымҳара азы, ирҳәеит аусеицура еснагь ишазыхиоу.
Аилатәара аҵыхәтәан ирылаҳәан иаҧсуам ашколқәа рҟны аҧсуа бызшәа арҵаҩцәа рзы иаарласны атренингқәа шымҩаҧгахо. Аилатәара ахықәкы - аметодикатә хеилак аусура аҳәаақәҵара – нагӡан.


Асиахь ахынҳәра

Иҿыцу аматериалқәа

Еимадоу асаитқәа