Аилак азы

Аилак азы
 

2016ш. нанҳәа 17 рзы, Аҧсны Аҳәынҭқарра Ахада Ҳаџьымба Р.Џь. Иусҧҟала иаҧҵан Аҳәынҭқарратә бызшәатә политиказы Аҧсны аҳәынҭқарратә еилакы. Уи хықәкы хадас иамоуп аҳәынҭқарратә бызшәа ахьчареи, ахархәареи, арҿиареи, амҩақәҵареи рзы иаку аҳәынҭқарратә политика анагӡара алзыршо аусмҩаҧгатәқәа реиҿкаара.

Аҧсуа бызшәа арҿиаразы иаҧҵаз аҳәынҭқарратә программа инамаданы, иахьа ҳара аус рыдаҳулоит абызшәа арҿиара иацхраауа иеиуеиҧшым апроектқәа. Урҭ ируакуп Аилак ахатә саит аҧҵара. Ара ҳара ишәыдаагалоит аҧсуа шәҟәқәа, ажәарқәа, ахәыҷқәа ирызку алитература, аҧсуа бызшәа арҵаразы ацхыраагӡатә методикақәа, акурсқәа, аҧсуа шрифтқәа. Ҳсаит аҿы ахәыҷқәа зызҿлымҳахо, аҧсшәахь иеиҭагоу амультфильмқәеи, афильмқәеи, иара убас амобилтә хархәагақәа рзы ахәыҷтәы хәмаррақәеи рыҧшааразы алшара шәоуеит.

Анапхгара

Хагәышь Баҭал Антипа-иԥа
Хагәышь Баҭал Антипа-иԥа
Аилак Ахантәаҩы
Аршба Ҭамила Хәыта-иҧҳа
Аршба Ҭамила Хәыта-иҧҳа
Ахантәаҩы ихаҭыҧуаҩ

Аилак аусура ахырхарҭақәа:

Аԥсуа бызшәа арҵара

Аҵараиурҭақәа русушьа иахылаԥшуеит, иҳәаақәнаҵоит, аметодикеи ҳаамҭа иашьашәалоу арҵаратә базеи (арҵага шәҟәқәа, аудио/авидео-материалқәа, амобилтә хархәагақәа) реиҿкаараҿы ацхыраара рнаҭоит, изҭаху рзы иеиҿнакаауеит абызшәа арҵаразы акурсқәа, иара убасгьы Аԥсны аҩныҵҟеиԥш анҭыҵгьы аҳәынҭқарратә бызшәа аларҵәареи арҿиареи иазку иеиуеиԥшым аусмҩаԥгатәқәа.

Аҳәынҭқарратә бызшәа арҵара иазку акьыԥхьтә, амедиа, аелектронтә аалыҵқәа еиқәнаршәоит, иҭнажьуеит. Есышықәса Аилак апрограммаҟны иҟоуп ашәҟәқәеи, адублиаж зызу афильмқәеи амультфильмқәеи, амобилтә ԥшьқәеи, аԥсуа бызшәа арҵара зырманшәало аелектронтә хархәагақәеи.

Аҟәша хықәкыс иамоуп агәаҳәара змоу хәыҷи дуи зегьы аԥсуа бызшәа дырҵара. Уи аусушьа еихшоуп анаҩстәи ақәратә категориақәа рыла: 0 инадыркны 3 ш. рҟынӡа, 3 ш. инаркны 6 ш. рҟынӡа, 7 ш. инаркны 10 ш. рҟынӡа, 10 ш. инаркны 16 ш. рҟынӡа, 16 ш. инаркны анаҩс.

Аиҭагара

Аиҭагаразы аҟәша хықәкыс иамоуп иеиуеиԥшым аусмҩаԥгара, азиндырра, азакәанԥҵара, иара убас асахьаркыратә, аҭҵаарадырратә литература, агуманитартә, атехникатә материалқәа реиԥш иҟоу апрофессионалтә документқәа реиҭагара иазку аиҭагаратә гәыԥ аусура аиҿкаара. Аҟәша аԥсуа бызшәа анормативқәа ҳасаб рзуны, аиҭагара ахаҭабзиара хылаҧшра анаҭоит, аиҭагаҩцәа аус рыцнауеит, аҭҵаарадырратә усбарҭақәеи аҵараиурҭақәеи ирымадоуп.

Абызшәатә инспекциа

Абызшәатә инспекциа Аԥсны Аҳәынҭқарра абызшәатә политиказы Аилак аҩныҵҟа аус зуа хырхарҭоуп. Ихадоу хықәкқәаны иамоуп Аԥсны аҳәынҭқарратә бызшәазы Азакәани аԥсуа бызшәа адырреи ахархәареи ирызку егьырҭ азинтә актқәеи аҳәынҭқарратә хылаԥшра рыҭара.

Аинспекциа аусурахь иаҵанакуеит:
- аҳәынҭқарратә усбарҭақәа, ауаажәларратәи акоммерциатәи еиҿкаарақәа аҳәынҭқарратә бызшәала русмҩаԥгара анагӡара ахылаҧшра;

- алитературатә нормақәа инарықәыршәаны аофициалтә текстқәа, адокументқәа, амедиа / аӡыргаратәи акоммерциатәи материалқәа рбызшәа хылаҧшра аҭара;

- астатистикатә дыррақәа реизгареи, Аилак иеиҿнакаауа аҧсуа бызшәа арҵара акурсқәа рымҩаҧгареи, анаҩс урҭ рылҵшәақәа рыхәшьареи рыла аҳәынҭқарратә усбарҭақәа рҟны аҧсуа бызшәа ахархәара ахылаҧшра